Dúas persoas tiveron que ser evacuadas ao Hospital do Salnés tras resultar intoxicadas por monóxido de carbono nun domicilio situado no lugar de Couto de Arriba, na parroquia de Castrelo, en Cambados.
O suceso produciuse pasadas as sete da mañá, cando unha persoa alertou ao 112 Galicia ao comprobar que dous ocupantes da vivenda, ambos de idade avanzada, se atopaban indispostos e con dificultades respiratorias. De inmediato, o servizo de emerxencias mobilizou a Urxencias Sanitarias de Galicia-061, así como ao servizo local de emerxencias de Cambados e á Policía Local.
Unha vez no lugar, os efectivos comprobaron que existía unha acumulación de monóxido de carbono no interior da vivenda, provocada polo mal funcionamento dunha cheminea, que encheu a casa de fume e reduciu os niveis de osíxeno. As medicións realizadas confirmaron a presenza do gas, polo que se procedeu á ventilación do inmoble.
O persoal sanitario atendeu ás dúas persoas afectadas no lugar e, posteriormente, organizou o seu traslado ao Hospital do Salnés para unha avaliación médica máis exhaustiva.
