Cáritas Ribeira recadou un total de 2.300 euros na súa Gala Solidaria de Nadal, celebrada cun espectáculo do grupo Mimarte que encheu o auditorio municipal e contou cunha excelente resposta do público.
O evento, que esgotou localidades, ofreceu unha proposta de teatro musical dirixida a toda a familia, na que se combinou fantasía, música e mensaxes sociais. O espectáculo incluíu a participación de distintos grupos de Mimarte e incorporou un futurista conto de Nadal cunha clara crítica ás redes sociais e unha chamada á reflexión sobre a realidade actual.
A recadación procede da venda de entradas, cunha achega de 5 euros, así como dunha rifa solidaria organizada durante a gala. Os fondos obtidos destinaranse aos programas habituais de Cáritas Ribeira, centrados na atención ás persoas e familias en situación de vulnerabilidade.
Desde a organización destacaron o éxito da convocatoria e agradeceron a colaboración do público asistente, así como a implicación dos artistas e persoas voluntarias que fixeron posible o desenvolvemento da gala. Cáritas Ribeira subliñou tamén a importancia deste tipo de iniciativas solidarias, especialmente nestas datas do Nadal, para seguir prestando apoio ás persoas que máis o precisan.
