O Concello de Boiro colabora co Club Ciclista Barbanza coa XXXVIII edición do Trofeo Ciclocross Concello de Boiro, que se celebra o vindeiro sábado 6 de decembro en praia Xardín, nas inmediacións do río Coroño. O alcalde, José Ramón Romero, participou este martes 2 de decembro na presentación da proba xunto co concelleiro de Deportes, Marcos Fajardo, o presidente da Federación Galega de Ciclismo, Carlos Muñiz; e o directivo do club, José Ramón Torrado.
Nesta proba deportiva participan as categorías infantil, cadete, junior, sub23 e master 30-40-50-60; en categorías masculina e feminina. O concelleiro de Deportes, Marcos Fajardo, animou aos deportistas a que “se inscriban nesta proba que está deseñada para todas as idades”.
O circuíto é de 3.000 metros e está situado nas inmediacións do río Coroño, collendo o piñeiral, un anaco da praia de Barraña e tamén parte da avenida de Compostela. “Tratase dunha proba xa consolidada do ciclocross e moi atractiva polo enclave no que se desenvolve”, recoñeceu Carlos Muñiz, da Federación Galega de Ciclismo.
A proba puntúa para a Copa Galicia do Porvir e tamén puntúa para o ranking de España e está prevista a participación duns 300 deportistas. “Participan clubs deportivos de toda Galicia e tamén do resto de España”, afirmaron por parte do Club Ciclista Barbanza.
O alcalde, José Ramón Romero, animou á veciñanza a achegarse este sábado ás inmediacións do estuario do río Coroño, en raia Xardín, “para presenciar esta proba que está máis que consolidada no calendario deportivo do noso concello”.
