A Xunta, a través de Augas de Galicia, contribuíu a eliminar recentemente un punto de vertido de augas residuais de carácter municipal no concello de Outes e outro particular no de Carnota.
O persoal do Programa de Control de Vertidos (PCV) detectou ambas incidencias “no marco dos labores rutineiros que realiza nestes concellos ao abeiro da campaña de inspección da rede fluvial da Demarcación Hidrográfica Galicia-Costa”, explicou Augas, engadindo que no caso de Outes, o episodio localizouse na parroquia de Cando e consistía na emisión de augas residuais urbanas “sen ningún tipo de depuración previa consecuencia da rotura na tubaxe de entrada nunha fosa séptica”. O vertido era efectuado ao terreo, onde remataba por infiltrarse.
Os técnicos do organismo autonómico instaron ao titular das instalacións para que adoptase as medidas oportunas co fin de solucionar a situación. Nunha inspección posterior á zona, comprobaron a emenda do punto de vertido despois de que o Concello de Outes procedese á reparación da tubaxe e a posta a punto da fosa, “o que permitiu poñer fin aos aportes de augas sen depuración ao dominio público hidráulico”.
No caso de Carnota, tratábase dun vertido de carácter particular na parroquia do Pindo que acababa no mar, polo que o persoal de Augas de Galicia contactou co propietario da vivenda para que realizase as actuacións necesarias para corrixir os aportes irregulares ao dominio público hidráulico.
Nunha inspección posterior á zona, os técnicos do organismo dependente da Xunta verificaron a emenda do punto de vertido unha vez executadas obras para a conexión das augas residuais cara á rede de saneamento municipal.
