Un total de 35 nenos e nenas participaron este luns 29 de decembro nun obradoiro infantil gratuíto de repostería do Nadal celebrado en Gastrolab Arousa, unha actividade que espertou, en palabras da organización, un notábel interese entre o público infantil e que obrigou a ampliar o aforo inicialmente previsto.
Nenos e nenas de entre 3 e 12 anos tomaron parte activa na elaboración de bolachas do Nadal, baixo a supervisión do cociñeiro Miguel Mosteiro. A elevada demanda rexistrada levou á organización para ampliar o número de prazas, inicialmente fixado en 25, ata un total de 35 participantes. Unha vez alcanzado este aforo, comunicouse a través de redes sociais o peche das inscricións, co obxectivo de manter unha atención personalizada e un seguimento próximo de cada neno e nena durante a actividade.
Durante a sesión, celebrada de 5 a 7 da tarde, os participantes traballaron a masa, cortaron as galletas e adobiáronas ao seu gusto, convertendo a repostería do Nadal nunha experiencia práctica e lúdica. Parte das elaboracións degustáronse no propio obradoiro e, ao finalizar, todos os pequenos puideron levarse a casa un prato con algunhas das súas creacións.
A actividade creativa e participativa contou ademais coa visita do Paxe Real da Asociación Boirense de Empresarios (ABE), que repartiu ilusión e detalles doces entre os participantes, reforzando o ambiente festivo propio destas datas.
Este taller infantil formou parte da programación especial organizada con motivo do 5º aniversario de Gastrolab Arousa, que inclúe obradoiros de balde tanto para público infantil como adulto, así como premios e descontos. O premio principal desta celebración sortearase o próximo 20 de xaneiro, data na que se entregará unha cesta regalo valorada en 1000 euros. As participacións poden obterse ata ese mesmo día en Gastrolab Arousa por compras superiores a 10 euros.
