O Auditorio Municipal de Rianxo acolleu este mércores 10 de decembro a cerimonia inaugural da VIII edición da Mostra Internacional de Cinema Documental Mares da Fin do Mundo, que se celebrará na localidade entre o 10 e o 14 de decembro.
A deputada de Lingua, Sol Agra, asistiu ao acto de apertura, salientando que o festival continúa a consolidarse como unha “cita de referencia” para o documental contemporáneo e para a difusión da cultura vinculada ao mar.
Durante a súa intervención, Agra referiuse á traxectoria da mostra como unha travesía que foi afrontando etapas diversas até chegar a Rianxo, e evocou as dificultades superadas ao sinalar que a organización “sempre lle puxo a proa ás dificultades e seguiu navegando”. Destacou que o certame reúne obras arredor das persoas “que viven do e para o mar”, xunto con actividades paralelas que achegan coñecemento especializado e participación da mocidade.
A VIII Mostra Internacional de Cinema Documental Mares da Fin do Mundo está organizada pola Asociación Cultural Mares da Fin do Mundo e patrocinada pola Deputación da Coruña, o Concello de Rianxo e a Xunta de Galicia. Trátase dun evento comprometido co medio mariño e o sector
pesqueiro, que procura xerar conciencia sobre a necesidade de coidar o mar coma un dos recursos naturais máis valiosos que temos. A Mostra MDFDM é asinante do Pacto Cultura Sustentábel, en liña coa Axenda 2030 e cos Obxectivos de Desenvolvemento Sustentábel (ODS).
Durante o acto inaugural tamén tomaron a palabra Marcos Gallego (director da Mostra) e Purificación Galán Boutureira (coordinadora provincial de
equipos de dinamización lingüística), quen salientou o apoio que a Secretaría Xeral da Lingua vén prestando á Mostra ao longo dos últimos catro anos pola súa aposta polo galego como lingua vehicular, subtitulando ademais todos os filmes á lingua galega.
Logo da intervención de Sol Agra interveu Olalla Figueira Castaño (concelleira do Mar de Rianxo) mostrando o orgullo que representa para o Concello de Rianxo acoller un evento coma a Mostra MDFDM e desexando que esta presencia teña continuidade en futuras edicións.
Deseguido, proxectouse o filme inaugural desta VIII edición de Mares da Fin do Mundo: As the Tide Comes In, de Juan Palacios e Sofie Husum Johannesen (Dinamarca, 2023). Enmarcado na primeira sesión da sección Proa, na que se programan filmes e cineastas que traballan na vangarda do cinema da realidade, este filme achegounos á realidade da illa danesa de Mando, no mar de Wadden. Os seus 27 habitantes atópanse nunha situación delicada ante os efectos que o cambio climático ten no seu territorio e no seu estilo de vida. Os cada vez máis frecuentes fenómenos meteorolóxicos extremos e o incremento do risco de inundacións poñen en perigo a súa identidade, á que se aferran teimosamente ao igual que fixeron as xeracións anteriores.
Nos vindeiros días proxectaranse un total de trinta e cinco obras que representan a dezaseis nacionalidades distintas e múltiples inguas (con subtítulos en galego), permitindo achegar aos espectadores á realidade de diversas zonas costeiras da xeografía mundial. Ademais do cinema, as persoas interesadas poderán asistir a diversas actividades paralelas como son o roteiro divulgativo Achegamento ao marisqueo a pé, da man da Agrupación de Mariscadoras a pé da Confraría Virxe do Carme de Rianxo, que se celebrará o venres pola mañá. O sábado pola tarde, o Pazo do Martelo acollerá o espazo de debate Mares de Madeira, no que se celebrarán dúas mesas redondas que abordarán temáticas vinculadas á nosa tradición mariñeira. A mañá do domingo comezará coa tradicional Mesa da Pesca Sostíbel, que baixo o título 100 anos xuntos polo mar poñerá o foco no traballo das confrarías de pescadores coincidindo co século de vida destas agrupacións. A continuación, será quenda da performance poética e audiovisual Nao Cetácea, a resistencia mariñeira, de Xosé Iglesias, unha poesía visual en directo que porá en valor o mundo mariñeiro.
Pechará a mañá a última das actividades paralelas desta VIII edición: a presentación de O cineísta andariego: a propósito de Bernardino de Lamas, de Manolo González.
MDFDM 2025 rematará o domingo coa entrega dos trofeos desta VIII edición. Os trofeos oficiais da Mostra serán os “Faros”, deseñados e elaborados pola Asociación Pro Saúde Mental A Creba, que representa o proxector cinematográfico, que co seu feixe de luz amosa novos mundos a través das imaxes. O Xurado Oficial, composto por Manolo González, Laura Doval e Adrián Canoura, será o encargado de outorgar o Premio á Mellor Película.
Pola súa banda, o público será o encargado de decidir o Premio do Público e Premio do Público á Mellor Película Galega mediante votación.
A Mostra Internacional de Cinema Documental MARES DA FIN DO MUNDO está organizada pola Asociación Cultural Mares da Fin do Mundo, coa colaboración na dirección e produción de ABA Films e o apoio, entre outros, da Deputación da Coruña, a Dirección Xeral de Política Lingüística da Xunta de Galicia e o Concello de Rianxo. Así mesmo, MDFDM forma parte de Proxecta (Coordinadora Galega de Festivais de Cinema, integrada na federación estatal Pantalla).
