A alcaldesa de Ribeira, María Sampedro, participou na presentación da segunda edición das Xornadas Interprofesionais para o BoTrato á infancia e á adolescencia, as cales celebraranse no 11 e 12 de decembro, en horario de mañá, organizadas polos Servizos Sociais Comunitarios.
A rexedora indicou que esta acción formativa artéllase arredor da Lei Orgánica 8/2021, do 4 de xuño, de Protección Integral á Infancia e Adolescencia fronte a violencia, coñecida como LOPIVI.
“Estas xornadas son unha ferramenta de referencia para a formación de profesionais que traballan no día a día con rapazada para garantir un espazos adecuados para o seu desenvolvemento nunhas etapas de gran importancia na vida como son a nenez e a adolescencia, momento no que se van conformando as personalidades e no que as experiencias poden marcar de por vida. Por iso, o Concello de Ribeira ten un compromiso férreo coa protección e promoción dos dereitos da infancia e da adolescencia, seguindo a cultura do bo trato, a través do respecto e a participación infantil. Estamos seguros da boa acollida desta segunda edición das xornadas e agardamos que se consoliden no tempo. Ademais, no vindeiro ano, concretamente en xaneiro e en setembro, teremos a Mesa da Infancia e Adolescencia onde intervirán distintos axentes sociais para valorar máis accións a executar para avanzar nesta materia”, en palabras da rexedora.
Pola súa parte, o concelleiro de Servizos Sociais, Vicente Mariño, manifestou que “somos un municipio pioneiro no traballo a prol dos dereitos da infancia e da adolescencia e, proba disto, son estas xornadas interprofesionais programadas pola Concellería de Servizos Sociais. Detrás desta acción hai moito traballo por parte do persoal técnico, pero tamén moitas ganas e profesionalidade para seguir avanzando na protección e mellora da calidade de vida das idades máis temperás da nosa sociedade. Esta é a segunda convocatoria dunha medida formativa coa participación de profesionais que chegan de diferentes puntos para formarse, pero tamén de entidades relevantes no ámbito social que achegarán os seus coñecementos e boa praxe nas conferencias”.
A sala polivalente do novo Auditorio Municipal de Ribeira será o espazo que acollan estas xornadas que terán como eixo central a capacitación para a creación de contornas educativas e sociais seguras, respectuosas e afectivas. Este ano contarase coa participación de Educo, Programa TEI, ASEIA, Feitoría Verde e Atalaias.
O público destinatario son profesionais que traballen directamente coa infancia, con independencia do ámbito que sexa: sanitario, educativo, social, xudicial, ocio e deportes, ademais de forzas e corpos de seguridade. As persoas que asistan a tódolos coloquios recibirán un certificado de participación de 9 horas de formación. As inscrición continúan abertas ata as 23.55 horas do 9 de decembro, cun total de 70 prazas, a través do formulario en liña habilitado.
Quen precise máis información, tena no enderezo electrónico educadora@ribeira.gal.
Programa das xornadas
A educadora social e promotora das xornadas, Iria Alén, na compaña da coordinadora de Servizos Sociais, Francisca Vidal, detallou o contido. No xoves, 11 de decembro, desenvolverase en horario de 09.00 a 13.30 horas e contará coas seguintes conferencias: Presentación do proxecto Mesa da Infancia e Adolescencia de Ribeira, a cargo da educadora social municipal e coordinadora do proxecto, Iria Alén; LOPIVI. Indicadores de violencia e notificación de casos, con Laura Álvarez, de Educo; e o Programa TEI Titorías entre iguais. Mellora da convivencia para a prevención da violencia e o acoso escolar, da man de María de los Ángeles Gómez González, formadora e coordinadora do programa TEI en Galicia.
Xa no venres, 12 de decembro, o horario será de 09.30 a 14.00 horas, cos simposios Violencia, adolescencia e vínculo, con Ricardo Fandiño, de ASEIA Galicia; e Os Foros de participación infantil e adolescente. Participar dende o Botrato, con Aida Raíndo Vázquez, de Feitoría Verde.
A maiores, lánzanse como actividades complementarias de carácter pechado, por convite nominativo, uns obradoiros programados para a tarde do xoves 11, na Casa da Xuventude. Noelia Darriba García, de Atalaias, impartirá Comunicación afectivo-consciente no acompañamento á infancia e Prevención e xestión consciente de conflitos.
Estas xornadas contan con financiamento da Consellería de Política Social e Igualdade da Xunta de Galicia e o Ministerio de Dereitos Sociais e Axenda 30 para o desenvolvemento de equipas de intervención coa infancia e familias dende os Servizos Sociais de Atención Primaria en execución da LOPIVI.
