O patrulleiro Tabarca (P-28), da Armada, fixo escala no porto de Ribeira, onde ficará ata a tarde do sábado 29. Durante a xornada deste venres 28, uns 160 escolares de Ribeira achegáronse para coñecer o buque da man da súa tripulación durante a patrulla de vixilancia e seguridade que se está facendo en augas do litoral galego nestes últimos días do mes de novembro. Alumnado dos colexios de Frións, Artes e Sagrado Corazón de Jesús estiveron no día de hoxe.
Ata alí tamén se achegaron o primeiro tenente de alcalde, Vicente Mariño; a concelleira de Educación, Nucha Brión; e o edil de Mar, Fernando Abraldes, para coñecer o navío e o labor que realiza guiados polo comandante José Enrique Delgado Gómez.
Dita estadía enmárcase na serie de paradas que realiza o navío polos portos para posibilitar á cidadanía facer un percorrido polo mesmo e coñecer o equipamento e capacidades, ademais da súa dotación e forma de vida a bordo.
O patrulleiro pode continuar visitándose durante a tarde deste venres 28, de 16.00 a 18.00 horas, e no sábado 29, de 10.00 a 13.00 horas.
Vixilancia e seguridade marítima
A súa misión é a de efectuar vixilancia marítima con presencia naval e control dos espazos marítimos de interese nacional, ademais de velar
polo patrimonio subacuático e colaborar no adestramento dos alumnos da Escola Naval Militar, en Marín, onde ten a súa base.
O Tabarca é o oitavo buque dunha serie de dez unidades da Clase Anaga, dos cales permanecen en servizo tres. Cada un leva o nome dunha illa da costa española e este toma a súa nomenclatura dunha pequena illa de Santa Pola. Este patrulleiro botouse no 23 de decembro de 1980 e entregouse á
Armada no 31 de decembro de 1981; adscrito ao Mando das Unidades da Forza de Acción Marítima de Ferrol (MARFER).
