A agrupación Unión de Cidadáns Independentes (UCIN) en Boiro anunciou oficialmente o nomeamento de Miguel Piqueras como novo coordinador local do partido. Con esta designación, UCIN busca reforzar a súa estrutura territorial e reafirma o seu “compromiso cunha política próxima, transparente e baseada no diálogo coa cidadanía”, sinalou a agrupación.
Miguel Piqueras asume este novo cargo con ilusión, enerxía e “un firme compromiso con Boiro e os seus veciños”, explicou.
Veciño moi coñecido na localidade e cunha ampla traxectoria de implicación na vida social e veciñal, Piqueras representa os valores que UCIN quere trasladar á política municipal: proximidade, escoita activa e traballo constante.
“Este é un proxecto que nace da xente e para a xente. Queremos que a veciñanza teña voz, que se sinta escoitada e que vexa resultados reais. O meu compromiso é estar presente, traballar desde o terreo e construír xuntos un Boiro mellor para todos”, sinala Miguel Piqueras.
Desde UCIN Boiro destacan que Piqueras “conta cunha visión clara das necesidades locais e unha gran capacidade para unir e xerar consensos, ademais de ter un perfil conciliador e unha implicación persoal na mellora do municipio que resultaron claves para o seu nomeamento”.
A nova coordinación local centrará os seus esforzos en “recuperar a confianza cidadá na política, promovendo a participación veciñal, o diálogo aberto e propostas que respondan de verdade as prioridades da xente”.
“Estamos aquí para sumar, non para dividir. Para traballar de xeito conxunto cos veciños e con todos os que crean que Boiro merece máis e mellor. UCIN é un proxecto aberto a todas as persoas que queiran achegar”, subliñou Piqueras.
