Galicia permanecerá este sábado, San Demetrio, baixo a influencia das baixas presións, que traerán consigo unha notable inestabilidade atmosférica. Agárdase unha xornada dominada polos ceos moi nubrados en todo o territorio, con precipitacións que se irán xeneralizando ao longo da mañá. As chuvias poderán acadar por momentos intensidade moderada ou forte, especialmente nas áreas máis expostas.
As temperaturas non experimentarán cambios significativos respecto a días anteriores.
En canto ao vento, soprará do suroeste durante a primeira metade do día, con intensidade moderada, aínda que será forte no litoral norte. Xa pola tarde, os ventos irán rolando a compoñente norte, mantendo unha sensación térmica máis fría.
O noso mar: Vento do sudoeste á mañá e do norte á tarde e á noite, forza 3 a 5 á mañá e á noite e 4 a 5 á tarde. Marusía á mañá e á noite e forte marusía á tarde. Visibilidade mala á mañá e á tarde e boa á noite. Mar de fondo do noroeste, con ondas de 1.5 a 2.5 metros á mañá, 2.5 a 3.5 metros á tarde e 2 a 3 metros á noite.
