O acto institucional incluíu o prendido de candeas e un minuto de silencio polas mulleres asasinadas este ano en España. A obra ‘Sen lingua’ convidou o numeroso público a reflexionar sobre os distintos tipos de violencia contra as mulleres
O Concello de Rois celebrou este sábado, 29 de novembro, o acto institucional do Día Internacional da Eliminación da Violencia contra a Muller, nunha xornada marcada pola reflexión, a memoria e o compromiso social. A cita tivo lugar no auditorio do multiúsos e contou coa lectura do manifesto municipal, a cargo da concelleira de Igualdade, Mercedes Basante, así como con diversos xestos de homenaxe ás vítimas da violencia machista.
Ao acto asistiron tamén os concelleiros Victoria Quiroga e Manuel Cobas, xunto co alcalde de Padrón, Anxo Arca, e a concelleira padronesa Laura Horta.
A programación deu comezo ás 19:30 horas coa lectura do manifesto institucional. No seu discurso, Basante lembrou que España rexistra no que vai de ano 38 feminicidios, dous deles en Galicia, que deixaron vinte menores orfos. Destacou que “as mulleres vítimas dos agresores machistas non son cifras, senón persoas en perigo sometidas a un sufrimento extraordinario” e salientou a necesidade de reforzar os mecanismos legais e de protección, ao tempo que condenou “a quen nega ou minimiza esta realidade”.
Tras a lectura, acendéronse candeas en memoria das mulleres asasinadas en 2025 e gardouse un minuto de silencio.
A programación continuou ás 20:00 horas coa representación teatral Sen lingua, da compañía Serea Teatro, que convidou ao público a reflexionar sobre as distintas formas de violencia e sobre como o machismo máis sutil continúa relegando as mulleres ao silencio e ao ostracismo.
Accións de sensibilización no municipio
Ademais do acto institucional, Rois desenvolveu nos últimos días diversas iniciativas para reforzar a conciencia social contra a violencia machista. O 25 de novembro, dependencias municipais, o centro de saúde, comercios e locais de hostalería prenderon candeas en memoria das vítimas e distribuíron folletos informativos do Centro de Información á Muller – CIM Terras de Iria, que ofrece asesoramento gratuíto ás veciñas.
O persoal municipal tamén se sumou á xornada cun minuto de silencio diante da casa consistorial, nun acto presidido polo alcalde, Ramón Tojo, acompañado de membros do equipo de goberno.
As accións de concienciación chegaron tamén aos centros educativos do municipio. O alumnado de infantil e de 4º da ESO participou en obradoiros específicos, e colocáronse sinais de tráfico contra a violencia machista na escola infantil e nos colexios de Dices e do Pumar
