A Concellería de Benestar Animal de Ribeira vén de poñer en marcha unha nova acción destinada a mellorar a xestión das colonias felinas existentes no municipio. Para iso, impulsará un curso de iniciación e reciclaxe no manexo de colonias felinas, que será impartido pola docente Ángeles Doval.
A formación terá lugar o sábado 22 de novembro, entre as 16:00 e as 20:00 horas, no Centro Cultural Lustres Rivas, e está dirixida tanto a persoas que se inician no coidado de grupos de gatos como a quen necesite renovar a súa acreditación.
O concelleiro de Benestar Animal, Eladio Muñiz, subliñou que esta iniciativa pretende “formar ás persoas participantes para garantir unha atención axeitada aos grupos de gatos e asegurar o correcto funcionamento das colonias felinas”. O curso servirá así como formación inicial e renovación das acreditacións das persoas colaboradoras do programa CER (Captura–Esterilización–Retorno) no concello. A actividade contará con entrada libre ata completar a capacidade.
