O Concello de Rianxo segue dando pasos cara a renovación completa do servizo municipal de recollida de lixo e limpeza viaria, un camiño de mellora para o que o Goberno local quere contar coa participación da cidadanía e coas súas contribucións directas. Por iso o Concello puxo a disposición da veciñanza unha enquisa para saber máis sobre os seus hábitos, coñecementos e necesidades en relación con este servizo.
“Antes do remate da lexislatura queremos ter renovado por completo o servizo, mellorando o parque de colectores, optimizando as rutas de recollida e incorporando as esixencias da normativa estatal aprobada recentemente”, sinalou o alcalde.
“Será un intenso proceso para dotarnos dun servizo eficaz e eficiente, tanto no eido económico como no eido da sustentabilidade, no que ademais queremos contar coa participación directa da veciñanza”, engadiu Bustelo, apuntando que a enquisa xa está dispoñíbel para a cidadanía na Rede.
