O presidente de Portos de Galicia, José Antonio Álvarez, reuniuse co presidente do Club Náutico de Ribeira, José Luis Torres Colomer, para avanzar nas vías de colaboración entre ambas entidades co obxectivo de mellorar as instalacións náutico-recreativas do municipio coruñés.
No encontro, celebrado na sede do ente público en Santiago, acordouse a dotación dunha nova pasarela de acceso ao rompeolas flotante, que permitirá impulsar o seu uso como pantalán de amarre e facilitar o acceso desde terra ás novas prazas que poidan habilitarse.
Tanto Portos de Galicia como o Club Náutico coincidiron en que esta actuación potenciará as posibilidades da entidade para atraer tránsitos de embarcacións de cara ao vindeiro verán, reforzando así o impulso ao turismo náutico no municipio.
