O 55% dos hospitais de Galicia son privados e realizan o 27% das cirurxías que se levan a cabo nesta comunidade autónoma, cuxos habitantes incrementan nun 2,2% -no conxunto de España un 1,6%- os contratos dun seguro sanitario privado, acadando un total de 460.086 persoas as que están subscritas a este sistema sanitario que evidencia en determinadas especialidades un trasvase mutuo de doentes.
O gasto sanitario privado representa en Galicia o 28,2% do total, segundo recolle o Observatorio do sector sanitario privado 2025. Este informe salienta que o volume dos concertos do Servizo Galego de Saúde (SERGAS) coa privada é de 246 millóns de euros sobre un gasto público total de 5.365 millóns (un 4,58%).
De todo o investimento sanitario en Galicia, o sector privado acomete o 29,2%. Amais, a sanidade privada dispón de 18 hospitais na Comunidade, o 55% do total, pero estes só teñen 2.156 camas, o 22% do total. Ambas as porcentaxes están por baixo do dato estatal.
Na actividade asistencial, o sector realiza o 27% das intervencións cirúrxicas en Galicia, da o 20% das altas e atende o 22% das urxencias, tamén menos ca media española. Asemade dispón do 43% dos PET e un 52% das resonancias magnéticas.
A falta de médicos nos centros de saúde de Galicia amosa un déficit que a propia Valedora do Pobo denunciou no seu último informe. Os traballadores da área sanitaria amosan constantemente a súa desconformidade coa marcha que segue a atención primaria na comunidade galega. E a voceira nacional do BNG, Ana Pontón, coida que esta unanimidade entre as persoas que traballan no ámbito sanitario, dáse fronte as “políticas de demolición” da atención primaria que, segundo denunciou a propia Pontón, leva a cabo o Partido Popular.
Para Ana Pontón as medidas de rescate aplicadas pola Xunta á atención primaria, fracasaron, e lembra que xa propuxera para esta lexislatura un plan de choque de 200 millóns de euros para reconducir os problemas de saúde nos centros de saúde.
…
