— Os socialistas esixen ao alcalde que cumpra coa lei, tal e como indica o informe da Secretaría Municipal.
O PSdeG-PSOE da Coruña esixe ao alcalde e ao goberno municipal de Outes a expulsión inmediata do concelleiro Antonio Caamaño das súas funcións executivas, despois de facerse firme a súa expulsión do Partido Socialista.
Desde a dirección provincial lembran que a lei debe cumprirse sen excepción e que existe un informe da Secretaría Municipal que conclúe claramente que, unha vez formalizada a expulsión do partido polo que foi elixido, Caamaño non pode manter nin mellorar as súas condicións laborais, nin conservar beneficios derivados da moción de censura, debendo recuperar exactamente a situación previa, sen soldo nin delegacións.
O PSdeG-PSOE considera que o mantemento do concelleiro nas súas actuais responsabilidades constitúe unha vulneración da normativa vixente e dos principios de legalidade institucional, polo que reclama que o Concello de Outes actúe de inmediato para repoñer a legalidade e cesar ao concelleiro das funcións que continúa exercendo de maneira indebida.
A dirección provincial advirte que, de non producirse unha actuación inmediata por parte do goberno local, o PSdeG-PSOE acudirá á Xustiza para garantir o cumprimento estrito da lei e para que se depuren responsabilidades derivadas desta situación.
O PSdeG-PSOE da Coruña reafirma o seu compromiso coa transparencia, coa ética pública e cun funcionamento institucional rigoroso, guiado sempre polos informes técnicos e pola normativa que regula a actividade municipal.
