O Laboratorio Ecosocial do Barbanza promove durante os meses de novembro e decembro un programa de plantacións de frondosas autóctonas nos montes veciñais da comarca, en colaboración con centros educativos e co tecido asociativo local. O obxectivo é implicar á comunidade escolar e á cidadanía na conservación da biodiversidade e na restauración dos ecosistemas forestais, poñendo en valor a xestión sostíbel dos montes veciñais.
As actuacións están coordinadas pola Fundación Montescola, entidade con ampla traxectoria en sensibilización ambiental e educación para a sustentabilidade, que ten implicado a máis de 1.000 persoas voluntarias en proxectos de restauración e conservación do monte galego.
Primeiras xornadas programadas
-17 de novembro: CEIP Plurilingüe de Artes (Ribeira)
-18 de novembro: Colexio Jaime Balmes (Noia)
-24 de novembro: CEIP Felipe de Castro (Noia)
-1 de decembro: CEIP Felipe de Castro (Noia)
-2 de decembro: CEIP Felipe de Castro (Noia)
As persoas ou entidades interesadas en participar ou organizar unha plantación no seu monte poden escribir a: info@montescola.org.
Laboratorio Ecosocial do Barbanza
O Laboratorio Ecosocial do Barbanza conta co apoio da Fundación Biodiversidad do Ministerio para la Transición Ecológica y el Reto Demográfico (MITECO) no marco do Plan de Recuperación, Transformación e Resiliencia (PRTR), financiado pola Unión Europea – NextGenerationEU.
Coordinado pola Fundación RIA, o Laboratorio Ecosocial do Barbanza é un proxecto dedicado a promover a transición cara á sustentabilidade ambiental e a fortalecer a resiliencia na xestión territorial dos montes do Barbanza.
