Este sábado, 29 de novembro, terá lugar a entrega dos premios do I Certame de Memoria Histórica para escolares, unha iniciativa promovida pola Comisión pola Recuperación da Memoria Histórica do Barbanza (CRMH) e Nova Escola Galega, coa finalidade de incentivar no alumnado a investigación, recuperación e divulgación das historias que axudan a comprender a identidade e o pasado colectivo da comarca.
O acto celebrarase ás 12.00 horas na biblioteca do IES Félix Muriel, en Rianxo, e incluirá unha charla titulada “A memoria histórica na aula”, impartida por José Antonio Pérez Fernández. Ademais, presentaranse os traballos galardoados e entregarásense os diplomas aos estudantes premiados.
Nesta primeira edición, o xurado destacou dous proxectos pola súa calidade, interese e sensibilidade. O segundo premio recaeu en “A cara dunha xeración: unha recopilación da vida de Joaquín Soliño Barbeito e a súa familia”, elaborado por Promethea Iñarrea Vázquez, un relato que recupera a memoria familiar para iluminar unha época marcada por lembranzas, silencios e vivencias transmitidas ao longo das xeracións.
Pola súa banda, o accésit foi para “O patrimonio de Sabugueira”, de Alba Recarey Noya, unha aproximación ao legado material, cultural e emocional dunha comunidade que mantén viva a súa identidade a través da memoria compartida.
A organización subliña que este certame nace coa vontade de achegar as novas xeracións á memoria histórica a través da curiosidade, da investigación rigorosa e do compromiso coa súa contorna, promovendo que o alumnado vexa o pasado como unha ferramenta de reflexión e aprendizaxe para o futuro.
