O alcalde de Padrón Anxo Arca e a concelleira de Medio Ambiente Ana Castro visitaron este 5 de novembro o stand informativo da campaña sobre a recollida de biorresiduos, aceites de cociña usados e téxtiles, que se desenvolve estes días en diferentes puntos do municipio.
As accións comezaron o martes 4 de novembro na praza de Macías e nas rúas Tetuán e Real, e continuarán o domingo 9 de novembro nos postos da praza de Abastos e nos postos da polbeiras. A iniciativa busca “informar á veciñanza sobre a correcta separación dos residuos e fomentar a participación cidadá na mellora da xestión ambiental”.
Lembraron que “en Padrón xéranse cada ano máis de 3.500 toneladas de lixo, das cales só o 20% se separa correctamente”. O Concello asume con fondos propios un déficit anual duns 360.000 euros entre o custe real da recollida e o que se ingresa polos recibos.
A campaña pon o foco na importancia de separar correctamente os residuos domésticos, xa que cada quilo mal separado encarece o servizo e limita os recursos municipais. Unha correcta separación permite reducir custos, cumprir coa normativa e avanzar cara a un sistema máis eficiente e respectuoso co medio ambiente.
O Concello de Padrón mantén o seu “compromiso cun modelo de xestión moderna e responsábel, que require tamén a implicación da cidadanía para lograr un municipio máis limpo e respectuoso co medio natural”.
