O alcalde de Padrón, Anxo Arca, acompañado das concelleiras Chus Campos e Mariló Saco, recibiu este xoves na Casa do Concello a Catalina Pereira Cortizo, veciña de Carcacía de 14 anos e campioa galega de fútbol en 2024. No acto, a nova deportista estivo arroupada polos seus pais e tíos, nun encontro que serviu para recoñecer publicamente a traxectoria dunha moza promesa do deporte padronés.
Catalina, que xa forma parte da Selección Galega Sub-14, compite actualmente en categoría sénior co Victoria CF, equipo da Terceira Federación. O alcalde destacou o apoio do Concello ao deporte de base e ás novas xeracións, animando á futbolista “a seguir traballando con ilusión para acadar as súas metas, sen esquecer a importancia da formación académica”. Arca subliñou tamén que “as portas do Concello están sempre abertas para apoiar a Catalina e ao conxunto de deportistas padroneses que representan con orgullo o nome da nosa vila”.
A deportista iniciou o seu camiño no colexio La Salle de Santiago, onde comezou practicando fútbol sala e fútbol campo. En 2024 proclamouse campioa galega coa selección comarcal de Santiago, un éxito que lle abriu as portas do Victoria CF, club no que milita actualmente. O pasado ano participou no Campionato de España coa Selección Galega Sub-14, coa que acadou as semifinais en Madrid.
A padronesa defínese como resiliente e loitadora, valores que agora a axudan a superar unha pequena lesión e a manter firme o seu obxectivo: chegar algún día á Selección Española.
Con este xesto, o Concello de Padrón quere poñer en valor o talento, o esforzo e a paixón polo deporte da mocidade local, reafirmando a súa aposta polo deporte feminino e pola promoción das novas promesas que representan o futuro do municipio.
