O alcalde de Noia, Francisco Pérez, e o tenente de alcalde, Manuel Seijas, mantiveron esta mañá unha reunión co patrón maior da Confraría de Pescadores San Bartolomeu, Santiago Cruz, e co secretario da entidade, Adelo Freire, para analizar diversos problemas que afectan ao estado da ría e ao sector marisqueiro.
Durante o encontro tratáronse cuestións como os vertidos directos á ría, o estado das obras da depuradora de Barro e a necesidade de continuar co arranxo e modernización dos 14 puntos de bombeo da localidade, dos cales na actualidade non funciona ningún.
Esta xuntanza serviu tamén como preparación da próxima convocatoria da Mesa Interinstitucional do Mar, na que tanto o Concello como a Confraría pretenden traballar conxuntamente en solucións concretas para mellorar a situación ambiental da ría de Noia e recuperar a produtividade dos bancos marisqueiros.
