O alcalde de Padrón, Anxo Arca, acompañado da concelleira Mariló Saco, desprazouse na mañá deste 19 de novembro ao Cemiterio de Santa María de Luou, en Teo, para coñecer os traballos de estudo e exhumación que o grupo de investigación HISTAGRA (Historia Agraria e Política do Mundo Rural) da Universidade de Santiago de Compostela (USC) está a realizar nunha fosa da resistencia armada antifranquista.
Durante a intervención estanse a recuperar os restos de catro guerrilleiros, entre os que é moi probábel que se atope Manuel Agrasar Cajaraville, veciño da Matanza (Iria Flavia), así como Ricardo Fernández Carlés, natural de Pontecesures.
Xunto a eles, foron localizados Florentino Menéndez Palacios, de Sama de Langreo, e Vicente López Novo, de Santa Uxía de Ribeira. Todos pertencían á V Agrupación guerrilleira, dirixida por Benigno Andrade, “Foucellas”, abatidos o 19 de maio de 1948 durante un enfrontamento en Loureiro (Luou), segundo distintas hipóteses históricas e testemuñas veciñais.
Durante a visita, Anxo Arca e Mariló Saco coñeceron de preto o proceso de escavación e análise forense de mans de Lucía Santiago, coordinadora en campo e investigadora de HISTAGRA, e de Sergio Sánchez, director da intervención arqueolóxica.
Na visita tamén participaron o xenro, a neta e a bisneta de Manuel Agrasar Cajaraville, que puideron seguir de preto o proceso e recibir información directa do equipo investigador.
O alcalde resaltou “o valor deste achado para preservar a lembranza das persoas ás que lles foi arrebatada a súa vida pola súa orientación ideolóxica, por defender o dereito á liberdade e para devolver ás familias os corpos co respecto que merecen”. Destacou tamén a relevancia desta exhumación para Padrón e a contorna, ao “recuperar a memoria dos veciños que participaron na resistencia antifranquista”.
Arca volveu trasladar o apoio de Concello ao grupo investigador e solicitoulle que, unha vez concluída a investigación, poida celebrarse unha conferencia en Padrón para dar a coñecer os achados, situar a intervención no seu contexto histórico e honrar a memoria destas vítimas da represión franquista.
