A Xunta lanza unha nova edición do bono Activa Comercio con descontos de ata 15 euros
O presidente da Xunta, Alfonso Rueda, anunciou este luns, tras a reunión do Consello da Xunta, unha nova edición do bono Activa Comercio, a segunda deste ano, que estará dispoñible para descarga a partir das 9:00 horas deste mércores.
Como nas edicións anteriores, cada persoa poderá descargar un único bono de 30 euros, que se irá descontando segundo o importe das compras realizadas. Así, aplicarase un desconto de 5 euros en compras entre 20 e 30 euros, de 10 euros se o gasto é de 30 a 50 euros, e de 15 euros a partir desa cantidade.
A principal novidade desta convocatoria é que os establecementos que xa participaron na edición do verán non terán que volver inscribirse. Os comercios que desexen sumarse agora poderán facelo ata o 15 de decembro, ou ata que se esgote o crédito dispoñible, fixado en 2,5 millóns de euros. A Xunta prevé que esta achega mobilice preto de 8,5 millóns de euros en vendas no comercio de proximidade.
Segundo explicou Rueda, o obxectivo desta nova convocatoria é apoiares especialmente os establecementos téxtiles, que este outono están a afrontar dificultades nas vendas polas condicións meteorolóxicas.
Dende a posta en marcha desta iniciativa, o Goberno galego asegura ter mobilizado 110 millóns de euros en vendas no comercio local. Na convocatoria de xuño, participaron 6.500 negocios e descargáronse preto de 215.000 bonos.
