A alcaldesa de Ribeira, María Sampedro, amousouse crítica coa Deputación da Coruña por, sinalou, “non ter tido en conta aos municipios de máis de 20.000 habitantes para o programa de dinamización comercial MercaNaVila”, e máis aínda cando “resta crédito dispoñíbel dos 6 millóns de euros dos que foi dotado o programa”, comentou, engadindo que “xa advertimos que o orzamento non se ía dar gastado e agora vemos como os alcaldes de Boiro e Noia solicitan que se prorrogue a campaña”. A rexedora considera que esta medida discrimina aos negocios de Ribeira, simplemente por ser un concello que supera o límite de habitantes establecido pola Deputación, “se ben o noso tecido comercial tamén é en gran parte pequeno comercio e téñense que enfrontar tódolos días ao reto de estar á fronte dunha pequena superficie, especialmente, agora que estamos no outono-inverno e baixan considerablemente as vendas, exceptuando a campaña de Nadal”.
A rexedora engadiu que “por esta mesma razón, non pode ser que haxa municipios limítrofes que estean gozando desta vantaxe, excluíndo
aos nosos comerciantes”. E apunta: “Xa se nos tiña que ter incluído dende o inicio da campaña”.
Por todo o exposto, anuncia que dende o Concello de Ribeira remitirase unha carta formal á Deputación da Coruña solicitando que tamén se teña ao seu tecido comercial ante unha posíbel prórroga.
