O Concello de Lousame celebrou pleno extraordinario e urxente no que se aprobou a actualización da taxa de residuos pola prestación do servizo de recollida, transporte e tratamento de lixo municipal. A medida chega un día despois da celebración da Asemblea da Mancomunidade Serra do Barbanza, na que se aprobaron os orzamentos para 2025, e ten como obxectivo que a nova taxa entre en vigor o 1 de xaneiro de 2026.
O alcalde de Lousame, Esteban Ares García, explicou que a actualización é necesaria para facer fronte ao déficit acumulado na liquidación de 2023, que ascende a 164.000 euros. “O recadado pola taxa do lixo non chegaba a cubrir esta cantidade”, sinalou o rexedor, quen lembrou ademais que o Concello mantén recorridas xudicialmente as cotas de 2024 impostas pola Mancomunidade Serra do Barbanza. O motivo, segundo apuntou, é que estas se basean en criterios “non recollidos nos estatutos da entidade”.
Ares tamén recordou que votou en contra das novas cotas de 2025 na xunta directiva da Mancomunidade celebrada o pasado 28 de outubro, “xa que non se acreditou a procedencia do incremento dos gastos imputados ao servizo”.
A pesar diso, o alcalde admitiu que “non é agradable para alguén que asumiu a alcaldía hai un mes ter que aprobar esta medida, pero a lei é a lei e temos que paliar esa parte que non se cubre coas cotas de 2023 para que o custe do servizo poida ser cuberto coas taxas”.
A proposta foi aprobada por unanimidade de todos os grupos municipais. Na práctica, a actualización suporá un incremento de 40 euros por vivenda a partir de 2026, repartidos en dous recibos semestrais de 20 euros cada un.
Finalmente, Ares adiantou que o goberno local xa está a traballar nos orzamentos municipais de 2026, coa intención de levalos a Pleno “en breve” para que poidan entrar en vigor ao longo do mes de xaneiro.
