No marco da VIII Mostra Internacional de Cinema Documental Mares da Fin do Mundo que este ano se celebra en Rianxo, e co gallo do Día Mundial da Pesca, este venres 21 de novembro celebrarase a apertura da exposición fotográfica aMar de Lorena do Merlo, fotógrafa de Boqueixón afincada no Barbanza (en Aguiera, Porto do Son).
A través dunha escolma de 40 imaxes, a autora rende unha homenaxe visual á dignidade do traballo no mar, á beleza dura da rutina e á forza da colectividade mariñeira.
A exposición poderase visitar no Auditorio de Rianxo ata o 14 de decembro.
A mostra inclúe imaxes en branco e negro e en cor, realizadas cunha cámara Canon Mark IV e unha Canon R6, que recollen con diferentes ópticas o mundo da pesca e o lado humano que hai detrás dos profesionais que protagonizan a actividade pesqueira do municipio. Ademais, conta coa proxección dun documental que aborda os naufraxios dos cerqueiros Divina del Mar e Sempre Güeto acontecido no ano 2021.
