No marco das actividades do 25N (o 25 de novembro celébrase o Día para a erradicación da Violencia contra as Mulleres), o Concello de Muros vai desenvolver un obradoiro de defensa persoal feminina. Trátase dunha actividade gratuíta programada para o próximo domingo 9 de novembro no Pavillón Municipal. A finalidade é que as mulleres teñan as ferramentas suficientes para sentirse seguras nunha situación de risco en todos os ámbitos da súa vida. O obradoiro componse de parte teórica e parte práctica, que se dá en conxunto para que a formación sexa dinámica. Será impartido por Juan José Martínez Ordóñez, adestrador de defensa persoal feminina titulado pola Federación Galega de Kung-fu e a Secretaría Xeral para o Deporte da Xunta de Galicia. As inscricións poden realizarse en liña no documento habilitado.
