O Concello de Boiro celebrou este xoves día 27 o pleno ordinario da Corporación local correspondente ao mes de novembro. A sesión contou coa ausencia dunha concelleira do Partido Popular e unha concelleira do Bloque Nacionalista Galego polo que o total de membros da corporación foi de 15. Como de costume, a sesión pode visualizarse íntegra a través da canle de Youtube do Concello de Boiro. O pleno saldouse con acordos relevantes, como a aprobación do regulamento do funcionamento e réxime interno do coworking e viveiro Lab Barbanza ou unha medida proposta polo BNG para incrementar os recursos públicos para facer fronte á violencia machista (con motivo do pasado 25N). Tamén foi aprobada (por unanimidade) a moción de Boiro Novo para completar o saneamento da conca do Coroño, proposta da que falamos este xoves dende este mesmo medio.
Aprobación da acta da sesión do 23/10/2025 – aprobación con 11 votos a favor (PSOE, BNG e Boiro Novo) e 4 abstencións (PP).
Aprobación definitiva da modificación da ordenanza fiscal nº28 reguladora da piscina municipal – aprobación con 9 votos a favor (PSOE) e 6 votos en contra (PP, BNG e Boiro Novo).
Aprobación inicial do regulamento de funcionamento e réxime interno do coworking e do viveiro de empresas Lab Barbanza do Concello de Boiro – aprobación con 10 votos a favor (PSOE e Boiro Novo) e 5 abstencións (PP e BNG).
Moción presentada polo grupo municipal do BNG relativa á reivindicación do día 25 de novembro e á necesidade de incrementar os recursos públicos para facer fronte á violencia machista – aprobación con 11 votos a favor (PSOE, BNG e Boiro Novo) e 4 abstencións (PP).
Moción presentada polo grupo municipal de Boiro Novo para completar a terceira fase do saneamento de Coroño – aprobación con 15 votos a favor (unanimidade).
Moción presentada polo grupo municipal do PP para a modificación da ordenanza fiscal reguladores do Imposto sobre Bens Inmobles (IBI) – rexeitada con 6 votos a favor (PP, BNG e Boiro Novo) e 9 votos en contra (PSOE).
Moción presentada polo grupo municipal do PSdeG-PSOE relativa ao canon da auga recadado por Augas de Galicia – aprobación con 10 votos a favor (PSOE e Boiro Novo), 4 votos en contra (PP) e 1 abstención (BNG).
