A só unha semana da celebración da Gala dos Premios ABE 2025, a Asociación Boirense de Empresas vén de anunciar algunhas das novidades que acompañarán esta edición, que se celebrará o venres 14 de novembro a partir das 20.30 h na Pousada da Galiza Imaxinaria. O evento contará coa presenza dun presentador de luxo: o actor, humorista e presentador de televisión David Amor, coñecido polo seu paso por series e programas de éxito, e recentemente participante en MasterChef Celebrity. “A súa presenza achegará humor, dinamismo e complicidade a unha gala que busca, ano tras ano, poñer en valor o esforzo e talento do tecido empresarial de Boiro”, avanzaron dende a ABE.
A noite incluirá tamén animación musical en directo co set en vinilo de Pidechas o Corpo, formado por Fragabuqui e Wanda Buluba, dúas auténticas namoradas do acetato e do baile. Desde que uniron forzas en 2017 veñen animando guateques e romarías con batallas musicais cheas de temazos (do punk ao yeyé) coa súa única teima: facer mover os pés.
Nesta edición, a ABE distinguirá ás seguintes empresas e profesionais:
Mellor comercio: Librería El cisne
Mellor empresa: Bar os Fornos
Premio de Honra ABE 2025: José Ramón Outeiral Lapido, pola súa traxectoria á fronte do Grupo Outeiral, referente no sector do transporte de viaxeiros con máis de 75 anos de historia.
Como novidade, a entrada será este ano física e exclusiva para socios e socias da ABE e convidados e entre todas as persoas asistentes sortearase un bono de 100 euros para consumir en negocios asociados.
A Gala dos Premios ABE “converterase unha vez máis nun punto de encontro para o empresariado local, combinando recoñecemento, humor e música nunha noite especial para celebrar o dinamismo e a unión do comercio e das empresas de Boiro”, sinalou a ABE.
“Esta gala é unha festa para todo o tecido empresarial de Boiro, unha maneira de recoñecer o esforzo diario de quen fai posible que a nosa economía local siga medrando e innovando”, destacou Daniel García, presidente da Asociación Boirense de Empresas.
