A iniciativa, coordinada polo Concello no marco do Laboratorio Ecosocial do Barbanza, ofrece formación teórico-práctica sobre a xestión sostible dos recursos forestais.
O Laboratorio Ecosocial do Barbanza, en colaboración co Concello de Rianxo, organiza un curso gratuíto sobre técnicas de aproveitamento resineiro, dirixido a persoas interesadas no emprendemento e na diversificación de actividades vinculadas ao monte.
Esta acción formativa, financiada con fondos europeos a través da Fundación Biodiversidad do Ministerio para la Transición Ecológica y el Reto Demográfico (MITECO), enmárcase no Plan de Recuperación, Transformación e Resiliencia (PRTR), financiado pola Unión Europea – NextGenerationEU.
O curso desenvolverase no Local da Comunidade de Montes de Baroña (Porto do Son) entre o 19 de novembro e o 19 de decembro de 2025, en horario de martes a venres, de 9.30 a 13.30 horas. A formación terá unha duración total de 60 horas teórico-prácticas.
Contidos e obxectivos
O programa abordará o marco legal e os requisitos da actividade resineira, así como as técnicas de extracción da resina, a seguridade e saúde laboral, e os aspectos económicos e de comercialización deste recurso natural.
O obxectivo é fomentar o aproveitamento sostible do monte e ofrecer novas oportunidades de diversificación económica nas zonas rurais, promovendo á vez a xestión responsable dos ecosistemas forestais.
As persoas interesadas poden inscribirse ou solicitar máis información a través do correo electrónico medioambiente@concelloderianxo.gal ou chamando ao teléfono 981 86 08 08 (en horario de mañá).
Laboratorio Ecosocial do Barbanza
Coordinado pola Fundación RIA, o Laboratorio Ecosocial do Barbanza é un proxecto que busca impulsar a sustentabilidade ambiental e fortalecer a resiliencia territorial nos montes do Barbanza, promovendo unha xestión máis equilibrada e respectuosa cos recursos naturais.
