Arrincaron en Muros as celebracións do 25N (Día Internacional pola Eliminación da Violencia contra as Mulleres). A axenda tivo un dos seus intres álxidos a semana pasada, coa presentación, no Local Social de Surribos (Abelleira), do libro As tolas que non o eran. Mulleres no manicomio de Conxo. 1885-1936, un dos grandes éxitos editoriais da literatura galega en 2025, obra obra de Carmen V. Valiña, quen estivo en Muros lendo fragmentos do seu libro acompañada de Maruxa Martínez, concelleira de Muller en Muros.
“Este é un libro sobre as que nunca importaron. As tolas que non o eran, rachando as follas co único que non puideron quitarlles: a coraxe para berrar que a historia non sempre é como nola contan”, recolle a sinopse de Editorial Galaxia sobre o libro, que é unha homenaxe á multitude de mulleres anónimas que foron relegadas ao esquecemento e ao anonimato durante practicatemente todo século XX só polo feito de ser persoas que non encaixaban no modelo imposto pola sociedade patriarcal: mulleres convertidas en números no sanatorio mental de Conxo, onde eran abandonadas por familiares, veciños e autoridades (que mesmo chegaban a instigar a súa entrada en Conxo), moitas delas obrigadas a pasar toda súa vida entre as paredes do manicomio sen que se tivese demostrado o máis mínimo trastorno mental que xustificase o seu internamento.
Así o avanza Carmen dende o libro: “As internas no manicomio de Conxo entre 1885 e 1936 tiñan todos os ingredientes que condenan a unha persoa á marxe: mulleres, aldeás, pobres, analfabetas, rebeldes. Pero as súas vidas gardan a potencia do fondamente humano”.
Máis axenda do 25N en Muros
As actividades coa comunidade educativa terán un especial protagonismo este 25N en Muros, coa charla teatralizada A violencia nos videoxogos, para o alumnado do IES Fontexería e o IES As Insuas, e a charla Desconecta a violencia: o perigo está en liña, en colaboración con ADISBISMUR para o alumnado do IES As Insuas.
O 25N instalarase no Curro da Praza un punto de sensibilización, en colaboración con ADISBISMUR e a Deputación da Coruña, e haberá unha concentración ás 12:00 horas.
Para pechar a programación, unha nova edición do Café Feminista o 29 de novembro no local de Agrovello, Tal, co tema A violencia psicolóxica. Contará coa intervención de Aurea Brea.
