A obra recupera a memoria dunha docente e activista pola igualdade, asasinada polo franquismo.
A escritora e investigadora Aurora Marco presentará mañá, xoves 13 de novembro, ás 20.00 horas, no auditorio da Biblioteca Victoriano García Martí, o seu novo libro María Vázquez, a mestra socialista eliminada polo franquismo.
“Resoaron na noite os disparos que acabaron coa vida dunha mestra vocacional, dunha renovadora pedagóxica, dunha muller progresista, militante socialista, afervoada defensora dos dereitos femininos”, así introduce Marco a figura dunha das mulleres máis destacadas da educación galega na II República e vítima da represión franquista.
O acto contará coa presenza da concelleira de Cultura, Patricia Lojo, da presidenta da Asociación Cultural Barbantia, María Xesús Blanco, e do editor, Henrique Alvarellos. A edil convidou á veciñanza a participar na cita para “coñecer a figura e o legado dunha muller referente na docencia e tamén na política, estreitamente vencellada ao noso concello”.
Durante o encontro, o público poderá escoitar da propia autora o proceso de investigación e escritura da obra, así como formular preguntas e compartir reflexións sobre o papel das mulleres na educación e na memoria histórica.
A elección de A Pobra do Caramiñal para a presentación non é casual: María Vázquez exerceu como mestra no municipio durante máis dunha década, logo de rematar os seus estudos de Maxisterio na Coruña.
Con este novo traballo, Aurora Marco continúa a súa labor de recuperación e divulgación das biografías de mulleres galegas esquecidas pola historia, reforzando o compromiso coa memoria e coa igualdade.
