Unha proposta de restauración ambiental da ruta xacobea a través da plantación de maceiras nas beiras do Camiño é o obxectivo que persegue a Asociación de Concellos do Camiño da Ría de Muros Noia coa iniciativa: Maceiras no camiño. Este proxecto, que pretende recuperar unha tradición histórica que axuda ao peregrino, é financiado a través do GALP Costa Sostíbel e estase a desenvolver grazas á colaboración do CEIP Ramón de Artaza, o IES As Insuas e o centro ocupacional Adisbismur, coordinados pola Asociación Muros Vila de Auga e Sal.
“Hai moitos anos, nas beiras dos Camiños de Santiago había moitas árbores frutais: pereiras, cerdeiras, ameixeiras… e moitas maceiras, polo que os peregrinos podían coller unha mazá, recuperar forza e seguir o seu camiño. Pero estas árbores foron desaparecendo co tempo”, explica Montse París, da Asociación Muros Vila de Auga e Sal, coordinadora do proxecto, quen indica que “o que pretendemos facer agora é plantar maceiras no Camiño da Ría de Muros Noia que dean sombra e alimento, ademais de encher de cores e mazás a nosa ruta xacobea”.
Indo ao proxecto, sinalar que o alumnado do CEIP Ramón de Artaza y Malvárez e do IES As Insuas (ambos centros de Muros) en colaboración con persoas usuarias do centro ocupacional Adisbimur plantaron xa un cento de maceiras de variedades autóctonas e aclimatadas ás condicións ambientais e meteorolóxicas da ría. Unhas maceiras identificadas cun cartel co símbolo da campaña: Maceiras no Camiño, no que se indica expresamente que os froitos desas maceiras están ao dispor dos peregrinos, ademais de agradecerlle, no seu caso, á persoa propietaria da parcela onde se realizou a plantación.
Entre as variedades plantadas figura, por exemplo, a Tres en cunca (tamén chamada Cacharela, ou De inverno) recollida en Santa María de Roo (Noia). Trátase dunha mazá de moita calidade que madura agora en novembro e gárdase até abril. A maiores, tamén se plantaron e se plantarán maceiras de especies como: Tres en rama, Morena raiada, Ollo mouro, De pebida, Grande plana estriada, Camoesa, Reineta do país, Mingán, Pero rico, Príncipe, Reineta de cedo e De pedra doce.
Montse París sinala que “escollemos maceiras porque son fortes e resistentes, medran en case calquera terreo, teñen un tempo de maduración moi longo, dan froito cada ano e cada variedade ten un sabor distinto”.
Asemade, pon en valor que sexan rapaces e rapazas da comarca os encargados da súa plantación xa que “o Camiño é historia viva e cada mazá que dea será unha lembranza de que a natureza e as persoas camiñamos xuntas. Pero tamén de que eses nenos e nenas, coas súas árbores, son xa parte do Camiño da Ría de Muros Noia”.
