Dende a Consellería de Medio Ambiente e Cambio Climático, a través de Augas de Galicia, veñen de dar conta das actuacións de conservación e mantemento fluvial que están a facer en máis de 5,5 quilómetros en varios ríos, no concello da Pobra do Caramiñal.
Máis polo miúdo, as tarefas, que xa foron comunicadas ao concello e que se prolongarán durante arredor de dez semanas, desenvolveranse en máis de 1,5 quilómetros do río Lérez; noutros 1,5 km no Pedras, e en algo máis de 1,4 quilómetros no Xundarama. A maiores tamén se actuará en treitos do rego Romeiras, do Morto e nun innominado ao seu paso por Santa María do Xobre.
Os traballos consisten na retirada de árbores caídas e biomasa presente na canle fluvial para evitar atoamentos, así como na eliminación de especies exóticas invasoras. Realizaranse coa aplicación de motoserras, rozadoiras, podadoras e outras ferramentas manuais. Asemade, o persoal contará co apoio de maquinaria de maiores dimensións como un camión e unha carretilla de carga.
Unha vez finalizadas as obras programadas polo organismo hidráulico dependente do Executivo galego, estes treitos fluviais quedarán despexados de maleza, posibilitando así a circulación fluída das augas.
Engadir que Augas de Galicia desenvolve estas accións no marco do programa de mantemento,
conservación e mellora do dominio público hidráulico das bacías de Galicia-Costa e nas zonas de acceso e protección. Cómpre salientar que se trata ademais do mantemento de zonas catalogadas como de Alto Risco Potencial Significativo de Inundación (ARPSI).
Por último, sinalar que o obxectivo dos traballos é mellorar os leitos fluviais para favorecer as condicións naturais do ecosistema dos ríos, actuando nas áreas nas que a Xunta ten competencias, fóra das tramas urbanas fluviais de responsabilidade municipal.
