O concello de Rois xa ten gañadora da primeira edición do concurso gastronómico “Rois nun bocado”, celebrado ao longo do mes de novembro para promocionar a hostalería local. A creación da Taberna de Angueira (Augasantas), bautizada como Montaña de ouro, conquistou o padal da maioría das 350 persoas que participaron na votación popular.
A tapa vencedora consistiu nun solombo de porco ibérico acompañado de patacas de Coristanco, queixo de Arzúa, cebola caramelizada e tomatiños da horta de Sara, unha combinación que se impuxo entre as oito propostas presentadas polos establecementos participantes. Como premio, a Taberna de Angueira recibirá 300 euros.
O segundo posto foi para Casa Benjamín (Vilachán), que presentou un solombo de porco á mostaza antiga en tempura, cuberto con algas wakame sobre cama de puré de castañas. A súa proposta, que quedou a escasos votos da gañadora, foi recoñecida cun premio de 250 euros. O Bar Muelle, tamén de Rois, completou o podio cunha costela a baixa temperatura con patacas fritas e salsa barbacoa, galardoada con 150 euros.
Durante as fins de semana do certame, centos de persoas achegáronse aos locais participantes, chegando algún deles a servir máis de 400 tapas. En total, 350 clientes emitiron o seu voto tras degustar polo menos tres tapas en dúas das zonas nas que se dividiu o municipio.
Ademais dos premios aos establecementos, o Concello sorteou tres vales de 100 euros entre os votantes, que recaeron en Miguel Rodríguez, Lorena Agrafojo e Patricia Ces.
Con esta iniciativa, o Concello de Rois busca dinamizar a gastronomía e a hostalería local, reforzando a súa oferta culinaria e poñendo en valor os produtos da comarca.
