A Concellería de Promoción Económica premiará a fidelidade da clientela da Praza de Abastos. Como parte da campaña Volta o Nadal, voltan as Caramiñas, o Concello lanzará unha serie de sorteos de vales de compra (Caramiñas) para mercar os produtos das ceas de Noiteboa e Noitevella e que deberán consumirse nos postos do mercado municipal.
Tal e como explicou a concelleira da área, esta iniciativa ten un dobre obxectivo: “non só buscamos pór en valor e dar a coñecer a variedade de negocios que hai na Praza de Abastos, senón tamén impulsar as compras nos mesmos nas festas de Nadal”.
A campaña estará dispoñíbel desde o luns, 1 de decembro, e o día 20 (ambos incluídos). Durante ese período, os comerciantes da Praza de Abastos darán á súa clientela un boleto de participación por cada 10 euros de compra. Pola súa banda, o consumidor deberá cumprimentalo cos seus datos persoais (nome, apelidos e teléfono de contacto) e depositalo nas urnas situadas nas instalacións da praza.
Unha vez se conte con todos os boletos, o Concello realizará dous sorteos. O primeiro será o luns, 15 de decembro (12.00 horas), e o segundo o luns, 22 (ás 12.00 horas) no propio mercado. Os galardóns consistirán en vales de compra (Caramiñas) para consumir na propia Praza de Abastos e comprar os produtos das ceas de Nadal (no caso dos sorteos do 15 de decembro) e de Noitevella (no caso dos sorteos do 22 de decembro). Deste xeito, as persoas agraciadas o 15 de decembro deberán trocar os seus vales desde ese día e ata o 24 de decembro. Por outra banda, as persoas gañadoras do do 22 de decembro deberán facer o propio entre o 22 e 31 de decembro.
Haberá sete premios en cada unha das rifas: un primeiro premio (400 euros de Caramiñas), dous segundos premios (200 euros de Caramiñas) e catro terceiros premios (100 euros de Caramiñas).
