A Entidade Urbanística de Conservación do Polígono Industrial A Tomada celebrou este luns 17 de novembro a súa asemblea xeral, na que a Xunta Directiva presentou o informe de xestión correspondente ao período agosto 2024 – outubro 2025, centrado na mellora da xestión, a transparencia, a seguridade e a modernización das instalacións comúns. Durante este período, a entidade impulsou diversas actuacións que, segundo fixeron saber os seus integrantes, “reflicten o seu compromiso coa eficiencia e a mellora continua”.
No ámbito das infraestruturas, executouse unha limpeza integral do polígono, incluíndo a roza de vexetación e a reparación de beirarrúas, o que contribuíu a mellorar a seguridade e a imaxe xeral do recinto. Ademais, púxose en marcha un plan de mantemento periódico, con actuacións regulares de xardinería e limpeza viaria, e reparáronse fochancas e danos na rede viaria, en colaboración co Concello da Pobra do Caramiñal, reforzando así a seguridade tanto de vehículos como de peóns.
Explicaron que un dos grandes fitos do período foi a instalación dun sistema de videovixilancia en puntos estratéxicos do polígono, conectado e controlado pola Policía Local, co fin de reforzar a prevención de actos vandálicos e mellorar a seguridade da contorna empresarial.
En materia de comunicación e imaxe, a entidade presentou un novo logotipo e un manual de identidade corporativa, co obxectivo de reforzar a marca do polígono e a súa proxección ante empresas e institucións.
Ampliación da gardería
Durante a asemblea abordouse tamén o proxecto de ampliación da gardería nas instalacións do complexo empresarial da Pobra, co propósito de aumentar a capacidade dispoñíbel para as familias traballadoras. A obra, subvencionada pola Xunta de Galicia, está prevista para finalizar o 1 de decembro de 2025, e incluirá dúas novas aulas e 40 prazas adicionais, que se sumarán ás 38 xa existentes. O prazo de matrícula para as novas prazas estará aberto do 1 ao 15 de decembro.
Visitas e accións conxuntas
Durante os últimos meses recibíronse no Polígono varias visitas institucionais, como a do subdelegado do Goberno na provincia, a conselleira de Medio Ambiente e Cambio Climático da Xunta de Galicia ou a xerente de SEA (Solo Empresarial do Atlántico) e leváronse accións en colaboración coa Fundación RIA ou coa Axencia de Doazón de Órganos e Sangue do SERGAS.
Explicaron que “o conxunto de actuacións desenvolvidas durante o último ano pon de manifesto
o compromiso da Entidade Urbanística de Conservación do Polígono Industrial A Tomada coa modernización das infraestruturas, a transparencia na xestión e o benestar das empresas e usuarios do parque empresarial.
“Estas iniciativas sentan as bases para continuar avanzando nun modelo de xestión participativa, eficiente e orientada ao futuro”, sinalou a presidenta do organismo, Isabel Cañas, e directa de Relacións Institucionais da empresa CONGALSA, con sede na Tomada.
