A agrupación local de UCIN Boiro denunciou publicamente a existencia de verteduras de augas fecais baixo a ponte de Escarabote, unha situación que cualifican de “grave” e que, aseguran, leva tempo afectando tanto a veciñanza como ás persoas que transitan habitualmente pola zona.
Segundo UCIN, o problema intensificouse nas últimas horas, alcanzando niveis “insostibles” pola cantidade de augas residuais que se están vertiendo directamente á contorna e o forte cheiro que isto provoca. A formación denuncia a inacción do goberno municipal e esixe responsabilidades tanto ao alcalde de Boiro como á concelleira de Medio Ambiente, a quen acusa de “permanecer impasibles” #ante unha problemática que cualifican de “persistente, visible e pestilente”.
Desde UCIN Boiro alertan das consecuencias ambientais, sanitarias e económicas que estas verteduras poden ter para a ría de Arousa, a actividade marisqueira e a imaxe do municipio. “Non se pode seguir permitindo que un dos principais recursos naturais e económicos do noso municipio siga sendo vítima do deixamento e o pasotismo institucional”, afirman.
A formación política esixe ao Concello de Boiro e a Augas de Galicia unha actuación inmediata para identificar a orixe das verteduras, detelos de forma definitiva e depurar as responsabilidades políticas e técnicas correspondentes. Así mesmo, recalcan a necesidade dun compromiso real coa sustentabilidade e a protección da contorna natural.
UCIN Boiro conclúe asegurando que continuará vixiante #ante este tipo de situacións e reafirma o seu compromiso coa defensa do medio ambiente, a calidade de vida dos veciños e a esixencia dunha xestión pública “responsable, transparente e eficaz”
