O novo goberno municipal de Ribeira puxo en marcha unha das súas liñas estratéxicas prioritarias: revisar e reactivar os proxectos de infraestrutura que permanecían paralizados. Entre eles atópase o Centro de Deportes Náuticos de Aguiño, unha instalación clave para o desenvolvemento deportivo e mariñeiro do municipio.
A alcaldesa, María Sampedro, denunciou a situación de bloqueo na que se atopaban numerosos proxectos vitais para a veciñanza ribeirense. “Somos un concello que mira ao mar, tamén no ámbito do deporte, e resulta necesario progresar na execución deste edificio”, sinalou a rexedora.
Neste sentido, Sampedro, acompañada pola concelleira de Economía e Facenda, Herminia Pouso, e persoal técnico municipal, mantivo unha reunión de traballo coa empresa adxudicataria co obxectivo de avanzar na execución das obras.
Esta semana chegarán as estruturas prefabricadas de formigón que conformarán o esqueleto da nave, despois de que fora preciso realizar modificacións por cuestións do terreo que afectaban á cimentación. Segundo as previsións municipais, en novembro o edificio contará xa coas paredes e en decembro coa cuberta, para comezar despois os traballos interiores e rematar a obra no mes de marzo.
A alcaldesa tamén destacou a colaboración do Club de Remo de Ribeira, que asesorará no equipamento deportivo para garantir que o centro conte co material máis axeitado para o desenvolvemento das súas actividades.
O futuro Centro de Deportes Náuticos contará con 1.156 metros cadrados divididos en dúas plantas. Na baixa situaranse a zona de almacenamento de embarcacións, o foso de adestramento, recepción, aseo adaptado e almacén; mentres que na primeira planta haberá un salón multiusos con aula e cociña office, despacho, baño adaptado, vestiarios, ximnasio e almacén.
