Recuperan en Outes un sancosmeiro, unha embarcación tradicional perdida
Outes volve a ser, un século despois, un referente na construción naval tradicional. Cada sábado, quince persoas participan nas clases de carpintería de ribeira que se imparten no museo Ciprián, situado onde funcionou un dos numerosos estaleiros que marcaron a historia mariñeira do municipio ao longo do século XX.
“Outes é a cerna da carpintería de ribeira. A principios do século pasado aquí había corenta estaleiros coma este, e nesta propia enseada doce”, lembra Xesús Mato Vilas, presidente da Asociación Terra de Outes, entidade promotora da iniciativa.
O curso céntrase na construción dunha maqueta a escala do sancosmeiro, unha embarcación tradicional galega que se está a reproducir neste mesmo lugar. O modelo orixinal está a ser elaborado polos profesionais dos Estaleiros Catoira, en Rianxo, quen recuperaron un deseño de barco de madeira que se perdera co paso dos anos.
Segundo explica o carpinteiro de ribeira Santiago Cancelas, o obxectivo é “ensinar as técnicas da carpintería de ribeira e, ao mesmo tempo, construír unha réplica que quede a medio rematar para que se vexa o proceso e os detalles da construción”. A peza final, engade, terá “un uso divulgativo e expositivo”.
A maqueta, construída a escala 1:3 —cunha eslora de arredor de 2,70 metros fronte aos máis de oito do barco real—, pasará a formar parte do museo e servirá tamén como ferramenta didáctica itinerante para explicar o proceso de construción tradicional.
Entre o alumnado hai persoas con perfís moi diversos. “Traballo no mundo do turismo, son guía oficial e gústame o patrimonio. A carpintería de ribeira, aínda que está un pouco esquecida, formou parte da vida da xente de Outes, e para poder explicala que mellor que coñecer o traballo real”, conta Miriam Avilés, unha das participantes.
O mestre Cancelas salienta o valor do oficio: “A carpintería de ribeira é un traballo de calidade, con material nobre. Non se aprende en dous días, require tempo e dedicación. É agradable para quen o practica e tamén respectuoso co medio ambiente”.
A Asociación Terra de Outes xa conta con cinco embarcacións asociadas ao museo da carpintería de ribeira. Con esta actividade, a entidade busca conservar e transmitir un saber facer artesanal que forma parte da identidade e da memoria mariñeira da comarca.
