A Casa da Cultura de Porto do Son acolleu, o pasado sábado 25 de outubro, a representación da peza teatral Golpes protagonizada por Estíbaliz Veiga e incluída na segunda edición da Mostra de Teatro de Porto do Son. O espectáculo volveu ser un éxito de público, co auditorio ateigado de veciños e visitantes.
A obra, dirixida por Xosé Leis e producida por Bernardino Martínez, visibiliza a escaleira de violencia que se pode crear a partir dunha relación desigual, representando a Pamela, unha muller que sobrevive ás violencias machistas e que conta a súa historia. Faino dun xeito directo, sen retoques, para facer reflexionar sobre a realidade vivida na súa pel e na de moitas
Esta obra conta coa colaboración da Consellería de Política Social e Igualdade en Galicia da Xunta de Galicia.
A Mostra prosegue este sábado
A II Mostra de Teatro de Porto do Son prosegue este sábado 1 de novembro da man da agrupación Gallaecia Eventos, que presentará o musical Cabaré Climático, tamén na Casa da Cultura de Porto do Son. Cabaré Climático é unha obra de teatro con música en directo que nos leva ao ano 2075, cando o quecemento da Terra é unha realidade que condiciona as relacións humanas, o amor e o humor.
O 8 de novembro, a compañía Culturaactiva achegará a obra cómica para público infantil e familiar Máis saaabor! O 15 de novembro, Talía Teatro representará Un Deus Salvaxe. O 22 de novembro, o grupo local Mimarte presentará Nais en apuros.
A clausura será o 29 de novembro coa comedia D.E.P, de Malasombra.
A obra Nais en apuros será de entrada libre, mentres que as restantes terán un prezo de 4 euros.
As entradas estarán dispoñíbeis dende o 14 de outubro na Oficina de Cultura (de luns a venres, de 8:00 a 15:00 horas) ou o mesmo día da función, só con pagamento mediante tarxeta bancaria.
