O Concello de Porto do Son vén de anunciar a convocatoria de bolsas destinadas a deportistas individuais do municipio, co obxectivo de fomentar a práctica e o rendemento deportivo entre a veciñanza que destacou ao longo do último ano en competicións oficiais.
Tres modalidades de axuda A iniciativa contempla tres tipos de bolsas, adaptadas ao nivel e categoría dos deportistas:
- Beca A: Dirixida a deportistas de disciplinas olímpicas ou paralímpicas que formen parte de seleccións nacionais absolutas e teñan opción de clasificarse para os Xogos Olímpicos. Dotación total: 2.500 €, a repartir entre as tres mellores puntuacións.
- Beca B: Para deportistas que acadaron resultados salientables en competicións oficiais. Dotación máxima: 1.000 €, tamén a repartir entre os tres mellores expedientes.
- Beca C: Enfocada a deportistas das categorías infantil e cadete. Dotación máxima: 1.500 €, distribuída entre os tres mellores.
Cada persoa solicitante deberá escoller unha única modalidade, xa que son incompatibles entre si.
Requisitos para optar ás bolsas As persoas interesadas deberán cumprir os seguintes criterios:
- Estar empadroadas en Porto do Son con, polo menos, tres anos de antigüidade.
- Dispoñer dunha licenza federativa vixente.
- Estar ao corrente das obrigas fiscais e coa Seguridade Social.
- Practicar un deporte olímpico, paralímpico ou de especial relevancia competitiva.
Prazo de presentación As solicitudes poderán presentarse ata o 6 de novembro a través do Rexistro Xeral do Concello ou da Sede Electrónica municipal, empregando o formulario dispoñible na web como Anexo I da convocatoria.
O alcalde, Luis Oujo, salientou que “a través desta iniciativa queremos axudar e impulsar a deportistas que, grazas ao seu esforzo e dedicación, están a conseguir grandes resultados en probas de ámbito autonómico, nacional e incluso internacional”. Engadiu que “todos e todas elas supoñen un orgullo para Porto do Son”.
