A portavoz nacional do BNG, Ana Pontón, compartiu a súa opinión sobre a moción de censura levada a cabo este 13 de outubro por parte do PP e o PBBI contra o Goberno local de Ribeira, formado por BNG e o PSdG (e até este mes de outubro, tamén, polo PBBI). Pontón cualificou a moción de “vergoñenta” e dixo que esta iniciativa reflicte “a preocupación do PP pola tendencia a alza dun BNG que goberna para a maioría e que cada vez é máis valorado polos veciños e as veciñas”. Esta moción, dixo, “demostra o nerviosismo cara un BNG que sobe, que mellora o seu apoio e, sobre todo, que demostra que goberna mellor os concellos que o PP”, sostivo.
Pontón criticou que “tal e como transcendeu nos últimos días, a moción de censura se acadase con presións e manobras escuras, o que pon de manifesto que o PP quere facerse co poder sen ter en conta a máis mínima ética e, desde logo, sen preocuparse polo ben dos veciños e das veciñas deste concello da Barbanza”.
En resposta ás preguntas dos xornalistas, a líder do BNG amosouse convencida de que tras o “bochornoso” triunfo da moción de censura debatida hoxe, a xente de Ribeira tomará nota e “poñerá no seu lugar” a cada un dos seus protagonistas na próxima cita coas urnas. “Estou convencida de que Luís Pérez Barral volverá ser alcalde tras as eleccións de 2027”, subliñou.
