Este xoves 16 de outubro o músico galego Pakolas estará en Boiro, no Centro Social, achegando o seu espectáculo familiar e infantil Ecoralia, a lambona ecolóxica. Será este xoves a partir das 19.00 horas.
Neste espectáculo musical, Pakolas guiará á rapazada coa súa forza interpretativa e o seu humor por todo un universo musical, a través da súa voz e a guitarra, nun espectáculo individual creado polo propio autor, onde a interacción e participación coas nenas e nenos, a animación, as súas caracterizacións e a súa música son o principal atractivo para o público.
En Ecoralia, a lambona ecolóxica Pakolas preséntanos o seu último librodisco, editado polo CRAEGA (Decembro-2024), e dispoñíbel este 2025 en todas as bibliotecas de Galicia
Neste novo traballo cóntase e cántase a historia de Ecoralia, que ensinará á rapazada, a través das súas cancións, a importancia de consumir alimentos ecolóxicos, para coidar o medio ambiente tanto na terra coma no mar, combater o cambio climático e garantir o benestar animal.
