O Conselleiro de Emprego, Comercio e Emigración estivo este mércores 8 de outubro en Rianxo para visitar as instalacións dos Estaleiros Catoira, onde foi recibido por Ramón Collazo, responsábel da empresa con sede no paseo do Porto rianxeiro, onde perdura no tempo como un dos derradeiros exemplos de construción naval tradicional en madeira (carpintería de ribeira). O conselleiro puxo en valor “a necesidade de impulsar esta tradición construtiva reivindicando e visualizando un oficio que ten moito futuro”.
Pola súa banda, o alcalde dixo que “Ramón e o seu equipo son hoxe custodios dun saber que pasou de xeración en xeración e que hoxe corre o risco de desaparecer”. E engadiu: “Garantir a continuidade da carpintería de ribeira non só supón favorecer a conservación dun inmenso patrimonio cultural, senón que tamén resulta fundamental para o futuro da construción naval de acordo cos estándares de sostibilidade que se marcan dende a Unión Europea”.
