O Concello de Ribeira vén de sacar a licitación a xestión dos servizos da escola infantil municipal por un período inicial de dous anos, cun valor estimado do contrato de 2.495.344,21 euros. Ademais, o prego contempla a posibilidade de prorrogar o servizo por outros nove meses adicionais.
Segundo informou o Goberno local, o obxectivo desta licitación é garantir a continuidade e a calidade na atención educativa e asistencial dos nenos e nenas de 0 a 3 anos que acoden a este centro.
A medida responde, segundo a área de Servizos Sociais, á necesidade de adaptar a contratación aos prazos e requisitos actuais, garantindo un funcionamento estable e eficiente da escola infantil.
O contrato inclúe a prestación de servizos educativos, asistenciais e de comedor, ademais da xestión do persoal e das instalacións municipais. Entre as condicións recóllese tamén o número máximo de prazas, o horario de atención e o ratio de profesorado por alumno, co fin de asegurar un servizo de calidade.
O Concello destacou que esta licitación reforza o compromiso municipal co apoio ás familias e coa conciliación laboral e familiar, mantendo os estándares de atención que caracterizan o centro educativo.
