A concellería de Cultura do Concello de Noia vén de presentar a súa ampla programación cultural para o último trimestre do ano, que abrangue os meses de outubro, novembro e decembro e inclúe máis de trinta actividades entre concertos, representacións teatrais, exposicións, cinema, lectura e eventos tradicionais como o Samaín ou o Magosto.
A axenda ofrece propostas para todos os públicos e idades, cunha aposta clara pola diversidade e pola posta en valor da creación galega. Entre as citas máis destacadas atópanse o concerto do Grupo Vocal e Instrumental Atlántico na igrexa de Santa María A Nova, a celebración do Día das Escritoras, o espectáculo ¡Salta! no Liceo e Noia, así como a actividade Da morte, o pranto e o alén no Reino de Galiza, conducida polo actor e contador Quico Cadaval.
En novembro, o público poderá gozar dunha nova edición da Mostra de Curtas, da Semana Musical Santa Cecilia, e de múltiples representacións teatrais dentro dos programas AGADIC e Outono das Artes. Xa en decembro, o Coliseo Noela acollerá espectáculos familiares como Rosalía, a pulga que escribía ou Os contos de Lobicán, ademais do tradicional Concerto de Nadal da Banda de Música de Noia.
A concelleira de Cultura, Chelo Martínez, salientou que “esta programación reflicte o compromiso do Concello con ofrecer unha oferta cultural ampla, accesíbel e de calidade, pensada tanto para o público infantil como para o adulto. Noia debe ser un referente cultural na comarca, un lugar onde a cidadanía poida atopar cada semana unha actividade coa que desfrutar, aprender e compartir”.
Martínez destacou tamén a colaboración de diferentes entidades e administracións, como a Deputación da Coruña, a Rede Cultural, AGADIC e a Rede de Bibliotecas de Galicia, que fan posíbel “un calendario que combina tradición e innovación, apostando pola cultura como motor de cohesión social”.
Toda a información detallada dos eventos, horarios e espazos pode consultarse no programa trimestral publicado pola concellería de Cultura e nos perfís oficiais do Concello de Noia.
