O Concello de Boiro recibiu da Deputación da Coruña subvencións para actividades e investimentos no ano 2025 mediante as que se levou a cabo a adquisición de roupa de emerxencias e tamén material para asistencia ás emerxencias. O importe total das subvencións recibidas ascende aos 10.390,13 euros.
O alcalde, José Ramón Romero, visitou a base de Protección Civil para coñecer o material adquirido. O obxectivo desta axuda é financiar a adquisición de actividades e investimentos para impulsar e reforzar os servizos que se veñen prestando á cidadanía por parte das agrupacións de voluntarios de Protección Civil.
Mediante esta subvención realizouse a adquisición de padiolas pregábeis, lanterna e cámara térmica; así como roupa técnica de rescate e emerxencias. Coa incorporación deste material búscase facilitar as tarefas do servizo de Protección Civil e emerxencias tales como a atención en accidentes de calquera tipo, así como a colaboración e apoio en materia de seguridade en probas deportivas e outros eventos.
O servizo de Protección Civil e Emerxencias do Concello de Boiro conta na actualidade cunha vintena de voluntarios que atenden a todo tipo de emerxencias producidas no termo municipal; así como a colaboración en dispositivos de outros concellos para eventos e actividades deportivas ou culturais, incidencias solicitadas polo CIAE 112 ou as forzas e corpos de seguridade tales como incendios, accidentes de tráfico ou busca de desaparecidos.
