O Concello de Boiro está a executar as obras para transformar o campo de fútbol da Mina, en Lampón, nunha moderna instalación con céspede artificial. A actuación inclúe tamén a adecuación da contorna para crear unha nova zona de aparcamento que mellorará os servizos e o acceso ao recinto deportivo.
O alcalde, José Ramón Romero, e o concelleiro de Deportes, Marcos Fajardo, visitaron recentemente as obras para coñecer o seu estado de execución. Segundo explicaron, o proxecto ten como obxectivo dotar a Boiro dun espazo deportivo máis funcional e seguro, adaptado ás necesidades dos clubs e usuarios.
Os traballos consisten na conversión do actual terreo de xogo, de árido e con importantes desniveis, nun campo de céspede artificial cunhas dimensións exteriores de 100×56 metros. O proxecto tamén contempla a instalación de parabalóns, barandas laterais e a mellora dos accesos.
Paralelamente, o Concello está acondicionando os terreos contiguos ao campo para destinalos a aparcadoiro, servindo de apoio á propia instalación deportiva. O investimento total das obras ascende a 673.325,59 euros e está financiado a través do Plan de Obras e Servizos (POS+ Concellos) da Deputación da Coruña.
