O Concello de Boiro promove dous novos cursos formativos da modalidade de Accións Formativas para persoas Desempregadas que van comezar no mes de marzo: Atención sociosanitaria a persoas no domicilio e Operacións básicas de restaurante e bar. O prazo de matrícula xa está aberto.
O curso Atención sociosanitaria a persoas no domicilio está previsto que se desenvolva entre o 17 de marzo e o 12 de setembro, impartirase en modalidade presencial de 9.00 a 14.00 horas no Centro de Formación e Viveiro de Empresas. Trátase dunha actividade formativa con certificado con nivel 2 polo que se necesita o Título de ESO, certificado de profesionalidade de nivel 1 da mesma familia, cumprir o requisito de acceso a ciclos formativos de grao medio ou superar as probas de acceso.
A formación en Operacións básicas de restaurante e bar comezará o 3 de marzo e desenvolverase ata o 2 de xuño en modalidade presencial en horario de 15.00 a 20.00 horas no Centro de Formación e Viveiro de Empresas de Espiñeira. Trátase dun curso con certificado nivel 1 polo que non existen requisitos académicos nin profesionais para o acceso.
As formacións son gratuítas e implican a realización de prácticas en empresas; está dirixidas prioritariamente a persoas traballadoras desempregadas inscritas como demandantes de emprego no Servizo Público de Emprego de Galicia e a súa situación laboral como non ocupada. Todos os cursos formativos contan co módulo transversal de inserción laboral, sensibilización ambiental e na igualdade de xénero e tamén sobre igualdade de oportunidades entre homes e mulleres.
A inscrición pode facerse directamente na Oficina Virtual de Emprego ou mediante o departamento de Emprego do Concello de Boiro, de forma presencial en Orientación Laboral, no teléfono 981 84 26 09 ou no enderezo electrónico emprego@boiro.gal.
Para levar a cabo estas propostas formativas o Concello de Boiro recibe da Consellería Emprego, Comercio e Emigración da Xunta de Galicia unha subvención por importe de 175.976,70 euros.
